सि.टा. समाचारदाता
सिमकोट । नेपाली काँग्रेस जिल्ला कार्य समिति हुम्लाले आफ्ना जिल्लाभर रहेका क्रियाशिल सदस्यहरुको नविकरण गर्ने मिति तोकेको छ । शुक्रबार उक्त पार्टीको जिल्ला कार्य समितिको नियमित बैठकले सो निर्णय गरेको हो ।
काँग्रेस हुम्लाका का.वा. सभापति कैलाश भण्डारीको अध्यक्षतामा वसेको जिल्ला कार्य समितिको नियमित बैठक पुराना क्रियाशिल सदस्यहरुको नविकरण गर्ने कार्य आगामी कातिक २५ गतेभित्र गरि सक्ने निर्णय गरेको काँग्रेस उपसभापति बसन्त रोकायाले जानकारी दिए काँग्रेस केन्द्रले नविकरण गर्ने समय सिमा नतोकेको भएपनि पुराना क्रिािशल सदस्यको जति सक्दो चाँडो नविकरण गर्ने कार्य सम्पन्न गर्न परिपत्र दिएको थियो । यो काम चाँडै सकेर नयाँ सदस्यहरुलाई पनि क्रियाशिल सदस्य दिनु पर्ने भएको कारण काम सम्पन्न गर्ने समय सिमा तोकिएको उनले बताए । यसका लागि क्रियाशिल सदस्यको नविकरण रसिद काँग्रेस गाउँपालिकाका सभापति मार्फत वडा सभापतिलाई यसअघि नै पठाई सकेको छ । हाल वडास्तरमा क्रियाशिल सदस्यहरुको नविकरण गर्ने कार्य छलफलको क्रममा रहेको छ ।
यसमा गाउँपालिका अनुसार नाम्खा गाउँपालिकामा ३१७ जना क्रियाशिल सदस्यहरु रहेका छन् भने सिमकोट गाउँपालिकामा एक हजार २१८ जना रहेका छन् । त्यसैगरि खार्पुनाथ गाउँपालिकामा एक हजार १७ जना रहेका छन् । उता सर्केगार्ड गाउँपालिकामा एक हजार ९३ जना रहेका छन् भने चंखेली गाउँपालिकामा ६०१ जना सदस्यहरु रहेका छन् ।अदाचुली गाउँपालिकामा ४७३ जना रहेका छन् भने ताँजाकोट गाउँपालिकामा २६४ जना सदस्यहरु रहेका छन् । पुराना क्रियाशिल सदस्यहरुको नविकरण सकिने बित्तिक्कै नयाँ समस्यहरुका लागि सदस्यता बितरण गर्ने कार्य सुरु गरिने उनले बताए । साथै बैठकले अन्य समसामयिक बिषयमाथि पनि छलफल गरेको छ । बैठकमा कावा सभापति भण्डारी, उपसभापति रोकाया, सचिव कृष्ण बहादुर बोहरा, कोषाध्यक्ष बबिता शाहीका पदाधिकारी र जिल्ला कमिटीका सदस्यको उपस्थिती रहेको थियो । काँग्रेस हुम्लाका पुराना क्रियाशिल सदस्यहरु सात वटै गाउँपालिकामा चार हजार ९८३ रहेको छ ।
