सि.टा. समाचारदाता
सिमकोट । चङ्खेली गाउँपालिका– ४ को केन्द्र पिप्लाङ भन्दा एक किलो मिटर पुर्वको लोती नदी माथि तुईन तरेको भाडा तिर्नु पर्ने बाध्यता रहेको छ । लोती नदीमा बन्नु पर्ने पुल हालसम्म नबनेको कारण बाईकलाई नदी वारपार गर्नका लागि सो भाडा लिने गरिएको हो । पिप्लाङका स्थानीय ब्यक्तिले निर्माण गरेको तुईनमा यात्रु तथा मोटर साईकल र पैदल यात्रु तारेको भाडा छुट्टाछुट्टै लिने गरेको यात्रु सन्तोस बोहराले बताए । उनले एउटा मोटर साईकल तारेको भाडा एक हजार पाँच सय रुपियाँ लिने गरिएको बताए । तुईनमा मोटर साईकल तार्न बीस मिनेट समय लाग्ने गर्छ । लोती नदी वारी पारी सडक निर्माण भएर मोटर साईकलहरु सञ्चालन हुँदै आएका छन् । नदीमा मोटर साईकल तारी सकेपछि यात्रुहरुले त्यसैमा चढेर सिमकोट र उता देउली हुँदै मुगु जिल्लासम्म यात्रुहरु पुग्ने गर्छन । मोटर साईकल चालकले अन्य बिकल्प नभएपछि महंगो तुईन भाडा तिरेर भएप्नि मोटर साईकल तार्ने गरिन्छ । यता यात्रु तारेको भने प्रति यात्रु एक सय रुपियाँ भाडा लिने गरिन्छ ।
