सि.टा. समाचारदाता
सिमकोट । खाद्य ब्यवस्था तथा ब्यापार कम्पनी लिमिटेडले बजार मुल्य भन्दा बीस रुपियाँ सस्तोमा चिनी बिक्री गर्न लागेको छ । लिमिटेडको प्रादेशिक कार्यालय सुर्खेतबाट पैदल मार्ग हुँदै शाखामा चिनी ढुवानी भएर आई पुगेपछि बिक्री गर्न लागिएको हो । यसअघि अन्य खाद्य सामाग्री बिक्री गर्दै आएको खाद्य ब्यवस्था तथा ब्यापार कम्पनी लिमिटेडको सिमकोट शाखाल अब चिनी पनि बिक्री गर्ने भएको छ । शाखाबाट पहिलो पटक सर्वसाधारणका लागि चिनी बिक्री गर्न लागिएको लिमिटेड सिमकोट शाखाका प्रमुख कृष्ण प्रसाद अधिकारीले बताए । यो चिनी ढुवानी अनुदानमा बिक्री गर्न लागिएको हो । प्रतिकेजी १३५ रुपियाँ पर्ने चिनीलाई पाँच रुपियाँ छुट दिएर प्रतिकेजी १३० रुपियाँमा बिक्री गर्न लागिएको उनले बताए । शनिबार बिहान मात्रै चालीस क्वीन्टल चिनी पैदल मार्गबाट ढुवानी भएर आई पुगेको र आईतबारबाट सर्वसाधारणलाई बिक्री गरिने छ । बजारमा चिनीको प्रतिकेजी १५० रुपियाँ पर्ने गर्छ । लिमिटेडले हुम्लामा चामल, तेल, मैदा बिक्री गर्दै आएको छ ।
