- सि.टा समाचारदाता
सिमकोट । बरामद गरिएको अवैध चिनीयाँ मदिरा नष्ट गरिएको छ । जिल्लामा बिक्रीका लागि बन्देज लगाईएको सो मदिरा लुकाएर लैजाने क्रममा सशस्त्र प्रहरीले बरामद गरेकोमा समितिको निर्णय अनुसार नष्ट गर्ने मुचुल्काका आधारमा सरोकारवाला पक्षको उपस्थितीमा नष्ट गरिएको हो । सशस्त्र प्रहरीले स्थानीय ब्यक्तिले लुकाएर लैजादै गरेको अवस्था फेला पारेको अवैध चिनीयाँ मदिरा नष्ट गरिएको छ ।
गत साउन २६ गते लुकाएर खार्पुनाथ गाउँपालिकातर्फ खच्चडमा ढुवानी गरेर लैजादै गरेको चिनीयाँ मदिरा मंगलबार नष्ट गर्ने कार्य भएको प्रहरी निरीक्षक नरेन्द्र चन्दले बताए । मदिरा सवै जमिनमा खन्याएर नष्ट गरिएको हो । उक्त मदिरा नाम्खा गाउँपालिका– २ को खगालगाउँबाट खार्पुनाथतर्फ लैजादै गरेको अवस्थामा गस्तीमा रहेको सशस्त्र प्रहरीका निरीक्षक डम्बर साउदको टोलीले बरामद गरिको थियो । बरामद भएको मदिरा ७२ कार्टुन रहेको थियो ।
यसबाट ८६४ बोतल मदिरा नष्ट गरिएको हो । सिमकोटमा सो मदिराको मुल्य प्रति बोतल पाँच सय रुपियाँ पर्ने गर्छ । सो नष्ट गरिएको मदिराको मुल्य चार लाख ३२ हजार रुपियाँ पर्न आउछ । मदिरा नष्ट गर्ने कार्यमा कोष तथा लेखा नियन्त्रक कार्यालयका प्रमुख चुडामणि बिक, सहायक प्रमुख जिल्ला अधिकारी अमृत सुबेदी, प्रहरी निरीक्षक चन्द, उद्योग बाणिज्य संघका उपाध्यक्ष छक्कबहादु रोकाया, सिमकोट गाउँपालिकाकी कार्यपालिका सदस्य गुहेला रावत, सशस्त्र प्रहरी निरीक्षक डम्बर बहादुर साउद लगाएको उपस्थिती रहेको थियो ।
