लोग भण्डारी
सिमकोट । हिमाली जिल्लामा उत्पादन हुने डाले चुकको संरक्षण गर्न संकलन गर्ने महिला किसानहरुलाई सिकेचर पन्जा सहयोग गरिएको छ । डाले चुकका दाना संकलन गर्न सहज होस भन्नका लागि ती सामाग्री सहयोग गरिएको हो । सिमकोट गाउँपालिका– १, २ र ३ का जंगलमा डाले चुक संकलन गर्ने जाने महिला किसानहरुलाई सिकेचर र हातमा लगाउने पन्जा सहयोग गरिएको हिमालयन वायो ट्रेड प्रालिले जनाएको छ । हाल हात र हँसियाले डाले चुकको हाँगा काटेर डाले चुक संकलन गर्दा डाले चुकका बोटहरु नष्ट हुन थालेपछि जति सक्दो बोटको संरक्षण गर्नका लागि यी सामाग्री सहयोग गरिएको हो । यसका लागि प्रालिले आर्थिक सहयोग गरेको हो । महिला किसानहरुलाई ती सामाग्री प्रालिका कार्यक्रम संयोजक निलम थापाले प्रदान गरेकी थिईन । कार्यक्रम संयोजक थापाले स्थलगत रुपमा पुगेर सामानहरु प्रदान गरेकी थिईन । तोर्पा, बरगाउँ, हुटिक र ठेहेका चालीस जना महिलाहरुलाई एक एक सेट ती सामाग्री सहयोग गरिएको हो । संकलकले डाले चुकका दाना संकलन गर्दा हातमा पन्जा लगाएर संकलन गर्न सहज हुने छ भने सिकेचरले साना हाँगा मात्र काट्ने छ । जसको कारण ठुला हाँगा अब किसानले काट्नु पर्ने छैन । यसका लागि प्रालिबाट युवराज सुवेदी समेत आएका थिए ।
