सि.टा. समाचारदाता
सिमकोट । आगामी मंसीर १६ गते हुन लागेको स्थानीय तहको उपनिर्वाचन कर्णाली प्रदेशमा उपप्रमुख, अध्यक्ष र उपाध्यक्ष पदका लागि हुने भएको छ । जसमा जाजरकोट, दैलेख र हुम्ला जिल्लामा उपनिर्वाचन हुनेछ ।
मंसीर १६ गते हुने उपनिर्वाचनमा जाजरकोटको नलगाड नगरपालिकाको उपप्रमुख, दैलेखको महाबु गाउँपालिकाको अध्यक्ष र हुम्लाको सर्केगाड गाउँपालिकाको उपाध्यक्ष पदका लागि हुने छ । जसमा जाजरकोटको नलगाड नगरपालिकामा काँग्रेसले उपप्रमुख जितेको थियो भने दैलेखको महावु गाउँपालिका अध्यक्ष पनि काँग्रेसले नै जितेको थियो । हुम्लाको सर्केगार्ड गाउँपालिकामा भने नेकपा माओवादी केन्द्रले उपाध्यक्ष पद जितेको थियो ।
स्थानीय तह निर्वाचन ऐन, २०७३ मा जिल्ला समन्वय समितिका प्रमुख, उपप्रमुख, गाउँपालिका अध्यक्ष, उपाध्यक्ष, नगरपालिका प्रमुख, उपपप्रमुख र वडाध्यक्षको पदावधि समाप्त नहुँदै निजको पद कुनै कारणले रिक्त भएमा र एक वर्षभन्दा बढी पदावधि बाँकी रहेको अवस्थामा बाँकी अवधिका लागि उपनिर्वाचनद्वारा पदपूर्ति हुने व्यवस्था छ ।
