मासिक समिक्षाले स्वास्थ्य संस्थाहरुको सेवा प्रभावकारी बन्दै

सि.टा. समाचारदाता

सिमकोट । स्वास्थ्य क्षेत्रमा सेवाग्राहीलाई प्रदान गरिने सेवालाई प्रभावकारी बनाउन मासिक समिक्षा कार्यक्रम सफल भएको देखिएको छ । सिमकोट गाउँपालिका भित्रका सवै स्वास्थ्य संस्थाहरुका प्रमुखहरुको उपस्थितीमा मासिक कार्य प्रगति अनिवार्य प्रस्तुती सहित समिक्षा कार्यक्रम आयोजना गरिएको हो ।
प्रत्येक महिना समिक्षा गर्ने कार्यले तत्काल स्वास्थ्य संस्थाहरुले भोग्ने समस्या समाधान हुन थालेपछि सेवा प्रभावकारी बन्दै गएको स्वास्थ्य शाखाका संयोजक नरबहादुर भण्डारीले बताए ।
चार वटा स्वास्थ्य चौकी सहित सिमकोट गाउँपालिका सवै स्वास्थ्य संस्थाहरुको मासिक समिक्षा सम्पन्न भएको हो  । महिना भरि गरिएको प्रगति र भोगिएका समस्या माथि केन्द्रीत भएर समिक्षा कार्यक्रम सम्पन्न भएको उनले बताए । बिशेष गरि सेवालाई प्रभावकारी र सेवाग्राही मैत्री बनाउनका लागि कर्मचारीबिच समिक्षा हुन आवश्यक ठानेरै यो कार्यक्रम आयोजना गरिएको उनले बताए । समिक्षाका स्वास्थ्य संस्था प्रमुखहरुले कार्य प्रगति, तत्थ्याङ्क विष्लेषण, समस्या पहिचान, असोज महिनामा गर्नु पर्ने कामको कार्ययोजना, औषधी बितरणको अवस्था खर्च र निकासा, महिनाभरि आफ्नै पहलमा स्वास्थ्यकर्मीहरुले गरेका नविनतम प्रयास माथि छलफल भएको थियो । स्वास्थ्यकर्मीहरmे काम गर्ने क्रममा स्वास्थ्य संस्थाहरुमा भोगेका समस्याहरु समेत जानकारी गराएका थिए । ती समस्या समाधानका लागि पनि छलफल गरिएको थियो । यो कार्यक्रम स्वास्थ्य शाखाले बिगत दुई वर्षदेखि आयोजना गर्दै आएको छ । यसबाट सेवा प्रवाहमा सहयोग पुर्याएको निचोड शाखाले बनाएको छ ।