सि.टा.समाचारदाता
सिमकोट । सिमकोट गाउँपालिकाको माध्यामिक विद्यालय स्तरीय पाँचौ राष्ट्रपति रनिङ शिल्ड प्रतियोगिता असोज १६ गतेबाट हुने भएको छ । गाउँपालिकाले यसअघि गरेको निर्णय अनुसार सो प्रतियोगिता दशै अगाडी सञ्चालन हुन लागेको हो ।
प्रतियोगिताका तयारी पुरा भएको सिमकोट गाउँपालिका– ३ को आयोजक रलिङ माविले जनाएको छ । यो प्रतियोगितामा गाउँपालिका भित्रका मानसरोवर, बालमन्दिर, सैपाल हिमाल, कर्णाली , कैलाश, रामदेव र आयोजक रलिङ माविले सबै इभेन्टमा सहभागीता जनाउने भएका छन् । आयोजक रलिङ मावि बरगाउँ भएपनि सिमकोटमा प्रतियोगिता सञ्चालन हुनेछ । यसका लागि छात्रा छात्रका तेह्र वटा ईभेन्टहरु छुट्टा छुट्टै रुपमा सञ्चालन हुनेछन् । प्रतियोगिताका लागि सात वटै विद्यालयबाट करिव साँढे चार सय छात्रा छात्रहरुले सहभागिता जनाउने छन् । आर्थिक सहयोग गाउँपालिकाको भएपनि निर्णय अनुसार प्रत्येक वर्ष पालो अनुसार विद्यालयले प्रतियोगिता सञ्चालन गर्दै आएका छन् ।
