सि.टा. समाचारदाता
सिमकोट । कर्णाली करिडोरको सिमकोट हिल्सा सडक खण्डको सिमकोट गाउँपालिका– ७ को धारापोरी गाउँको ठाडो ढुङ्गामा आईतबार पून सुख्खा पहिरो खसेको छ । एक्कासी माथिबाट पून तेस्रो पटक सुख्खा पहिरो खसेपछि आठ दिनयता सो सडक अवरुद्ध हुँदै आएको छ । उक्त सडक खण्डमा काम हेर्दै आएका निर्माण कम्पनीका प्रतिनिधि नरेन्द्र रावतले पहिले पहिरो गएको स्थानमै आईतबार तेस्रो पटक पहिरो खसेको बताए । पहिरो पन्छाएर सडक निर्माण गरि रहेको अवस्थामा पून पहिरो जाँदा काम अवरुद्ध भएको छ । यसअघि तीस मिटर पहिरो पन्छाएर सडक सफा गर्दै गरेको अवस्थामा सडकको पुर्व पट्टी दोस्रो पटक सुख्खा पहिरो आएर सडकको मर्मत कार्य रोकिएको थियो । पून पहिरो आएपछि काम समेत रोकिएको छ । यसअघि सडकमा माथिबाट आएको सुख्खा पहिरो कारण दुई सय मिटर सडक पुरिएको कारण यातायात सेवा पुर्ण रुपमा बन्द हुँदै आएको छ । पहिरोको कारण सडक अबरुद भएपछि सिमकोटबाट गएका यातायातका साधन चारटाँगेसम्म पुगेर सिमकोट फिर्ता हुने गरेका छन् भने हिल्साबाट आएका गाडी धारापोरी गाउँको माथिसम्म आउने गरेरका छन् । पहिरोले अबरुद्ध भएको सडकमा मानिस आउजाउ गर्न नसक्ने भएको कारण पैदल यात्रुहरु र खच्चड सवै चौगानफया गाउँ भएर जाने गरेका छन् । सो क्षेत्रको सडकमा दुई सय मिटर लम्वाई र डेढ सय मिटर माथिबाट सुख्खा पहिरो खसेको छ । पहिरोले तीन वटा बिधुतका पोलहरु ढालेको कारण बिधुत सेवा अबरुद्ध भएको छ । त्यसैगरि धारोपोरी गाउँका लागि खानेपानीको पाईपलाईन समेत पहिरोले बगाएको कारण पानीको समस्या सुरु भएको छ । सो खण्डको सडकमा हाल हिल्सा सिमकोट सडक आयोजनाको लगानीमा दाप्चा आरएन जेभी हेटौडाले निर्माण कार्य जारी राखेको थियो । सो खण्डको सडकको निर्माण कार्य आगामी पुस मसान्तसम्म सम्पन्न गरि सक्नु पर्छ । यसका लागि आयोजनाले आठ करोड रुपियाँ लागत लाग्ने गरि निर्माण कम्पनीसं सम्झौता गरेको थियो । पहिरो गएपछि निर्धारित मितिमा सडकको निर्माण कार्य सम्पन्न हुने कार्य समेत अन्यौलमा परेको छ । त्यसैगरि पहिरोले चौगानफया गाउँ जाने बाटो र मान बहादुर शाहीको घर समेत जोखिममा परेको छ । यसअघि गत आईतबार गएको थियो । त्यसयता यातायात सेवा अबरुद हुँदै आएको छ ।
