सि.टा. समाचरादाता
सिमकोट । माओवादी केन्द्रले पालिका तहसम्म खबरदारीसभा गर्ने भएको छ । सोमबार अध्यक्ष पुष्पकमल दाहाल प्रचण्डको निवास खुमलटारमा बसेको पदाधिकारी बैठकले पालिका तहसम्म खबरदारीसभा गर्ने निर्णय गरेको हो ।
माओवादीले मंसिर मसान्तसम्म पालिका सम्मेलन गर्ने भएको छ । सरकारविरुद्धको खबरदारी सभा र पालिका सम्मेलन एकासाथ मंसिर मसान्तसम्म गरिनेछ । सरकारले गरिरहेको बेथितिहरूविरुद्ध खबरदारी गर्न जनपरिचालन गर्दै मंसिर मसान्तसम्म पालिका सम्मेलन र खबरदारी सभा एकैसाथ गर्ने निर्णय गरिएको हो ।
त्यस्तै केन्द्रीय कमिटी बैठक आउँदो पुस २ गतेका लागि बोलाएको छ । पदाधिकारी बैठकबाट माओवादीले प्रत्यक्ष निर्वाचित कार्यकारी राष्ट्रपतिको माग गरेको छ । राजनीति विकृति अन्त्यका लागि भन्दै माओवादीले प्रत्यक्ष निर्वाचित कार्यकारी प्रणालीमा जानुपर्ने ठहर गरेको हो । बैठकले माओवादी केन्द्रले देशको प्रमुख कार्यकारीको निर्वाचन प्रत्यक्ष निर्वाचन प्रणालीमार्फत गर्नुपर्ने प्रस्ताव राखेको छ । यसले विकृति, विसंगति, र राजनीतिक अस्थिरताको अन्त्य गर्ने पार्टीको धारणा रहेको बैठकले ठहर गरेको हो ।
