सि.टा. समाचारदाता
सिमकोट । सिमकोट बिमानस्थल बिस्तार गर्ने कार्य अगाडी बढ्न सकेको छैन । सरकारले चालु आर्थिक वर्षमा सिमकोट बिमानस्थल बिस्तारका लागि रातो कितावमा बजेटको ब्यवस्था नगरेको कारण काम अगाडी नबढेको हो । गत जेठ पन्द्र गते नेपाल सरकारले ल्याएको बजेटमा सिमकोट बिमानस्थलका लागि बजेट ब्यवस्था नगरेको कारण बिमानस्थल बिस्तारको कार्य अगाडी बढाउन नसकिएको नागरिक उड्डयान प्राधिकरण सिमकोट शाखाका प्रमुख महेन्द्र बहादुर सिंहले बताए । उनले जिल्लामा बिमानस्थल बिस्तारका लागि जिल्लाबाट गर्नु पर्ने सबै कामहरु पुरा भई सकेको भएपनि बजेट ब्यवस्था नभएकै कारण अगाडीको काम नबढेको बताए । प्राधिकरणले सरकारले केही मात्र बजेटको ब्यवस्था गरेको भएपनि बिमानस्थलको जग्गा बिस्तार कार्य अगाडी बढाउन सकिने भएको भएपनि सरकारको तर्फबाट बजेट ब्यवस्था नभएको कारण प्राधिकरण एक्लैले बजेटको ब्यवस्था गर्न नसक्ने आफुलाई प्राधिकरणले जनाएको उनले बताए । हालको बिमानस्थल भन्दा डेढ सय मिटर पश्चिमतर्फको जग्गा अधिकरणका लागि सबै प्रकृया पुरा भई सकेको छ । यसका लागि साठी दशमलव ८१ रोपनी जग्गा बिमानस्थल बिस्तारका लागि लिन लागिएको छ । यसको मुआव्जा दिनका लागि पैतीस देखि चालीस करोड बजेट लाग्ने अनुमान गरिएको छ । यसमा नौ वटा घरहरु पनि अधिग्रहण हुनेछन् । सगै कार्य अगाडी बढेको जुम्ला बिमानस्थल विस्तारका लागि बजेटको ब्यवस्था भएको कारण काम अगाडी बढी सकेको छ ।
