सि.टा. समाचारदाता
सिमकोट । चीनसंग सिमाना जोडिएका हुम्ला र बझाङ जिल्लाका स्थानीय तहका जनप्रतिनिधिहरु बैठकमा भाग लिन चीनको ताक्लाकोटतर्फ लागेका छन् । मंगलबार बिहान सिमकोटबाट हिडेको टोली बेलुका हिल्सा हुँदै ताक्लाकोटतर्फ लागेको हो ।
चीनसंग सिमाना जोडिएका दुई वटा जिल्लाका जनप्रतिनिधिहरु मंगलबार हिल्सा पुगेर ताक्लाकोटतर्फ लागेको नाम्खा गाउँपालिकाका अध्यक्ष प्रेमबहादुर लामाले बताए । चीनको बुराङ काउण्टीको ताक्लाकोटको स्थानीय प्रशासनसंग दुई देशबिचको तीन वटा बिषयमा छलफल हुने उनले बताए । बैठकमा चीनसंगको छलफलमा हिल्सामा निर्माण कार्य भई रहेको मितेरी पुल, कोट ब्यपस्थापन र दुई देशका बिचमा आपसी सदभावका विषयमा छलफल हुने उनले बताए । बैठकमा भाग लिन हुम्ला जिल्लाका नाम्खा गाउँपालिकाका अध्यक्ष लामा, सिमकोट गाउँपालिकाका अध्यक्ष बिजय भण्डारी, खार्पुनाथ गाउँपालिकाका अध्यक्ष कर्णबहादुर रावल र ताँजाकोट गाउँपालिकाका अध्यक्ष लालकेश जैसीको सहभागिता रहेको छ भने बझाङ जिल्लाको सुर्मा गाउँपालिकाका अध्यक्ष खड्कबहादुर बोहरा र सैपाल गाउँपालिकाकी उपाध्यक्ष डोल्मा तामाङको सहभागीता रहनेछ । त्यसैगरि कर्मचारीहरुमा हुम्ला जिल्लाका प्रमुख जिल्ला अधिकारी नारायण प्रसाद पाण्डे, नाम्खा गाउँपालिकाका प्रमुख प्रशासकीय अधिकृत नन्दकृष्ण पाध्याको पनि सहभागिता रहेको छ । बैठक कातिक २८ र २९ गतेसम्म सञ्चालन हुनेछ ।
