सि.टा. समाचारदाता
सिमकोट । आगामी मंसीर १६ गते हुने स्थानीय तह उपनिर्वाचनका लागि छ हजार आठ सय भन्दा बढी मतदाताले मतदान गर्न पाउने छन् । सर्केगार्डमा मुख्य निर्वाचन अधिकृतको कार्यालय स्थापना भएसंगै मतदाता संख्या पनि सार्वजनिक भएको हो । सर्केगार्ड गाउँपालिका उपाध्यक्ष पदका लागि हुन गई रहेको उपनिर्वाचनका लागि छ हजार ८१० मतदाताले मतदान कार्यमा सहभागिता जनाउन पाउने मुख्य निर्वाचन अधिकृत शम्भुप्रसाद बरालले बताए । सर्केगार्डमा शुक्रबार मुख्य निर्वाचन अधिकृतको कार्यालय स्थापना भएको थियो । उनले उपनिर्वाचनका लागि बाह्र वटा मतदान स्थलका लागि तेह्र वटा मतदान केन्द्र निर्धारण गरिएको बताए । मंसीर २ गते उम्मेदवारको मनोनयन दर्ता कार्य भएपछि निर्वाचनका काम सुरुवात हुनेछ । हालसम्म निर्वाचनमा खटाउने कर्मचारीको बारेमा एकिन नभएपनि खटनपटनका लागि समिति रहेको छ । सो समितिले निर्वाचनमा खटिने कर्मचारीको नामावली सिफारिस गरेपछि १० गतेसम्म मुख्य निर्वाचन अधिकृतको कार्यालयले नियुक्त गरेर बाह्र गतेसम्म तालिम दिई सकेपछि नजिकका मतदान स्थलम तेह्र्र गते कर्मचारी पुग्ने र टाढाका मतदानस्थलमा मंसीर १४ बिहानसम्म कर्मचारी पुग्ने उनले बताए । यस पटकको उपनिर्वाचनका लागि मुख्य र निर्वाचन अधिकृतमा जिल्ला न्यायधीस समेत रहेका बरालनै नियुक्त भएका छन भने सहायक निर्वाचन अधिकृतमा अदालतका श्रेस्तदार ज्ञानबहादुर खत्रि नियुक्त भएका छन् ।
