सि.टा. समाचारदाता
सिमकोट । कर्णाली करिडोरको कालिकोटको जितेदेखि हुम्लाको खार्पुनाथ गाउँपालिकाको खार्पुसम्म यात्रा गर्ने यात्रुहरुले सास्ती खेप्नु परि रहेको छ । सो खण्डको सडक कच्ची र त्यस माथि धुलाम्मे भएको कारण यातायातका साधन त्यसमा फस्ने भएको कारण यात्रुले दुःख झेल्नु परि रहेको हो । सिमकोटबाट सुर्खेतसम्मको यात्रा गर्नु भएका यात्रु दिनेश बोहराले हुम्लाको खार्पुदेखि कालिकोटको जितेसम्म कम्तीमा धुलाम्मे सडकमा जीप फस्दा बाह्र स्थानमा गाडीबाट बाहिर ओलिएर हिडनु परेको बताए । बाक्लो बाक्लो धुलै धुलो भएको सडकमा ठुलादेखि साना यातायात साधनहरु फस्ने भएको कारण यात्रुले सास्ती झेली रहेको उनको भनाई छ । उनले खार्पुदेखि जितेसम्मको दुई सय किलो मिटर सडकमा तीस घण्टा यात्रा गर्नु परेको बताउदै यसको मुख्य कारण धुलाम्वे सडकमा गाडी फस्ने समस्या रहेको बताए । धेरै धुलोको कारण यात्रुहरुलाई रुघाखोकीको समस्या हुने गरेको बताउदै पैदल यात्रा झनै कठिन भएको तर गर्नै पर्ने बाध्यता हुम्लावासीलाई रहेको उनले बताए । गाडी चालक पुनर तामाङले ठाउँठाउँको कच्ची सडकमा धुलैधुलो हुने भएको कारण यातायातका साधनहरु फस्ने कार्य सामान्य जस्तै भएको जानकारी दिए । उनले कहाँ कति बेला गाडी फस्ने हो, भन्ने नसकिने अवस्था रहेकोले यात्रु निकाल्नु गाडी धकेल्नु पर्ने काम जारी रहने गरेको बताए । यसले गर्दा यात्रा पनि लामो हुने गरेको छ भने कतिपय स्थानमा पाँच छ घण्टा गर्नु परि रहेको छ । यसले गर्दा यात्रु तथा चालकहरुले भोकै यात्रा गर्नु परि रहेको छ । हाल यो सडक खण्डमा यात्रुहरुको कठि यात्रा हेर्दा यसको पिडा बुझ्ने निकाया नै नभएको भान यात्रुहरुलाई हुने गरेको छ ।
