सि.टा. समाचारदाता
सिमकोट । सिमकोट गाउँपालिका– ७ को धारापोरी गाउँका ठाडो ढुङ्गामा गएको सुख्खा पहिरो पन्छाउने कार्य सुरु भएको छ । उक्त वडाको चौगानफया गाउँका स्थानीयको बिरोधको कारण सडकमा खसेको सुख्खा पहिरो पन्छाउने कार्य यसअघि रोकिएको स्थानीयको सहमतिपछि सोमबारबाट सो पहिरो पन्छाउने कार्य सुरु भएको हो । पहिरो गएको स्थान ठाडो ढुङ्गा भन्दा माथि चौगानफा गाउँ रहेको र सो गाउँका स्थानीयले सडकमा खसेको सुख्खा पहिरो पन्छाउने कार्यमा अवरोध गरेको भएपछि पछि गाउँलेसंगको छलफलपछि पहिरो पन्छाउन सुरु भएको सिमकोट गाउँपालिका– ७ का वडा अध्यक्ष बलबिर शाहीले बताए । स्थानीय सो पहिरो पन्छाउदा गाउँलाई जोखिम हुने भन्दै त्यसको बिरोध गरेका थिए । तर सार्वजनिक काम नरोक्न स्थानीयलाई अनुरोध गरिएपछि काम सुचारु भएको उनले बताए । यसअघि निर्माण कम्पनी दाप्चा जेभीले दुई पटक सडकमा खसेको पहिरो पन्छाउने कार्य सुरु गएको भएपनि माथिबाट पून पहिरो खस्ने क्रम जारी रहँदा रोकिएको थियो । उक्त सडकको निर्माण कार्य सम्पन्न गर्ने म्याद पुस मसान्तसम्म रहेको छ । स्थानीयले काम गर्न दिएपछि समयमा काम सम्पन्न गर्ने बाटो खुलेको छ ।
