सि.टा. समाचारदाता
सिमकोट । राष्ट्रिय कार्यक्रम अनुसार सिमकोट गाउँपालिकामा बालबालिकालाई भिटामिन ए र जुकाको औषधी खुवाउने कार्यक्रम सुरु भएको छ । स्वास्थ्य सेवा कार्यालयबाट भिटामिन बुझ्नेर वडामा पुर्याएपछि भिटामिन र जुकाको औषधी खुवाउने कार्य सुरु भएको हो ।
गाउँपालिकाका आठ वटै वडामा शुक्रबारबाट भिटामिन ए र जुकाको औषधी खुवाउने कार्य सुरु भएको गाउँपालिका स्वास्थ्य शाखाका प्रमुख नरबहादुर भण्डारीले बताए । यसका लागि वडा स्तरका स्वास्थ्य संस्थाका स्वास्थ्यकर्मीहरु खटिएर यो काम गरि रहेको उनले बताए । सिमकोट गाउँपालिकाले वडा नम्बर १ मा ४६ जना, २ मा ११२ जना, ३ मा २८, ४ मा ४०, ५ मा १४३ जना, ६ मा १७३ जना, ७ मा १९४ जना र ८ मा २०८ जना गरि ९४४ जना बालबालिकालाई भिटामिन ए र जुकाको औषधी तीन दिनमा खुवाउने लक्ष्य लिएको छ । यो कार्यक्रम छ महिना माथि र पाँच वर्ष मुनिका बालबालिकाहरुका लागि सञ्चालन गरिएको हो । उनले सिमकोट गाउँपालिकाले आईतबारसम्म यो कार्यक्रम जारी राख्ने बताए ।
