सि.टा. समाचारदाता
सिमकोट । मंसीर १६ गते हुने उपनिर्वाचनको अवधिभर जिल्ला बाहिर र गाउँपालिका बाहिरका मानिसहरु सर्केगार्ड गाउपालिकाको निर्वाचन क्षेत्रमा बस्न नपाउने भएका छन् । बुधबार बेलुका बसेको सर्वदलीय बैठकले निर्वाचन निष्पक्ष र शान्तिपुर्ण रुपमा सम्पन्न गर्न यस्तो निर्णय गरेको हो ।
उपनिर्वाचन शान्तिपुर्ण र निष्पक्ष रुपमा सम्पन्न गर्न जिल्लाका सवै राजनीतिक दलहरु र स्वतन्त्र पक्ष सहमत भएको बताउदै मुख्य निर्वाचन अधिकृत शम्भु प्रसाद बरालले निर्वाचन अवधिभर उपनिर्वाचनका लागि जिल्लामा आएका र सर्केगार्ड गाउँपालिका बाहिरका कुनै पनि ब्यक्ति निर्वाचन क्षेत्रमा नबस्ने र आआफ्नो घरमा जाने निर्णय सर्वदलीय बैठकले गरेको बताए । त्यस अनुसार निर्वाचनको प्रचार प्रसारका लागि सर्केगार्ड गाउँपालिकामा रहेका ब्यक्तिहरु मंसीर १३ गतेबाट छोड्ने छन् । त्यसैगरि बैठकले निर्वाचन आचार संहिताको पुर्ण पालन गर्ने र मौन अवधिभर कुनै पनि राजनिित दलहरुले प्रचार प्रसार नगर्ने निर्णय पनि गरेको छ । त्यस्तै शान्ति सुरक्षामा खलल पुग्ने कुनै पनि गतिविधिहरु राजनीति दलहरु, ब्यक्तिहरुबाट नगर्ने प्रतिबद्धता समेत जनाईएको छ । बैठकमा मुख्य निर्वाचन अधिकृत बराल, प्रमुख जिल्ला अधिकारी नारायण पाण्डे, प्रहरी नायव उपरिक्षक रबिन्द खनाल, राजनीतिक दलहरु नेपाली काँग्रेस, नेकपा एमाले, नेकपा माओवादी केन्द्र, रास्वपा, राप्रपा र स्वतन्त्र उम्मेदवारका प्रतिनिधिहरु उपस्थिती रहेको थियो ।
