सि.टा. समाचारदाता
सिमकोट । हिमाली जिल्ला हुम्लाको दुर्गम गाउँकी एक जना गर्भवती महिलाले बाटो मै सुत्केरी हुनु परेको छ । बस्ती भन्दा स्वास्थ्य चौकीको प्रसुती गृह टाढा भएको कारण बेथा लागेकी गर्भवती महिलालाई प्रसुती गृहमा लैजाने क्रममा बाटोमा सुत्केरी गराईएको हो ।
स्वास्थ्य चौकीबाट तीन घण्टा टाढाको चङ्खेली गाउँपालिका –६ को दुर्गम पुमा गाउँबाट बेथा लागेकी २० वर्षकी तारा बुढालाई हिडाएर र त्यसपछि स्टेचरमा बोकेर मेल्छामा स्वास्थ्य चौकीमा लैजादै गर्दा बाटोमै सुत्केरी गराउनु पर्ने अबस्था आएको मेल्छामा स्वास्थ्य चौकीका संयोजक हर्क बुढाले बताए । आईतबार बेथा लागेकी गर्भवती बुढालाई गाउँबाट सेल्मुसासम्म हिडाएर महिला स्वास्थ्य स्वयम सेविका तारा बुढा र अर्को एक जना पुरुष मिलेर लगिएको थियो बेथा अझै असहज भएपछि त्यहाँबाट छोट्टी पुरयाउने ढुस्कासम्म स्टेचरमा गर्भवतीलाई बोकेर लगिएको थियो । सोही स्थानमा महिला स्वास्थ्य स्वयम सेविकाले सुत्केरी गराएकी हुन । बिहान पाँच वजे घर मै रहेको बेला बेथा लाग्न सुरु भएको थियो । त्यसपछि बेथा केही बढ्दै जाँदा उनलाई स्वास्थ्य चौकीमा लिने ब्यवस्था गरिएको हो । सुत्केरी भएको स्थान भन्दा केही परसम्म मेल्छाम स्वास्थ्य चौकीले चार जना स्थानीय पठाईएको थियो । पछि सुत्केरी भई सकेको जानकारी पाएपछि उहाँहरु फिर्ता हुनु भएको थियो । स्वाथ्थ्य चौकी प्रमुख हर्क बुढाले सुत्केरी भई सकेको भएपनि आमा र नवजात शिशुको सुरक्षाका लागि स्वाथ्य चौकीमा ल्याउन आग्ह गरेपनि घरपरिवारले सुत्केरी भई सकेको कारण घरफिर्ता लिने बताउदै घरतर्फ लगिएको बताए । त्यसपछि आफुले स्वास्थ्य चौकीबाट अनमी कविता तामाङलाई सुत्केरीको घरमा पठाएर इम्फेक्सन लगाएतका सुरक्षाको उपचार गरिएको उहाँले बताउनुभयो । सुत्केरी महिलाको गाउँमा पुमामा साुमदायी स्वास्थ्य इकाई पनि स्थापना गरिएको छ । यस आर्थिक वर्षको बाटोमा सुत्केरी हुने यो पहिलो घटना हो ।
फोटो क्याप्सन
बिच बाटोमा सुत्केरी भएकी महिला ।
