सि.टा. समाचारदाता
सिमकोट । जिल्लाको दक्षिणी क्षेत्रको अदानचुली गाउँपालिका–४ को मछारीमा आईतबार बिहान माथिबाट खसेको ढुंगा घरको छतमा बजारिदा जेसीभी चालकसहित तीन जना घाइते भएका छन् । घाईते तीनै जनाको नेपाली सेनाको हेलिकोप्टरबाट दिउसो साँढे दुई वजे सुर्खेत उद्धार गरिएको हो ।
घटनामा दैलेखको दुल्लु घर भएका जेसीभी चालक वर्ष २९ का बखत खड्का गम्भीर घाइते भएका थिए । आईतबार बिहानको समयमा रिल्म हुँदै विगाठीसम्मको सडक निर्माणका लागि काम गरिरहेका उहाँहरू मछारी पुलपारिको एक घरमा सुतेका थिए । अचानक माथिबाट खसेको ठूलो ढुंगा घरको छतमा खसेपछि घरभित्र सुतेका खड्कासहित रुकुम पश्चिमको सानाभेरी नगरपालिका– १ का वर्ष १६ का रोसन राना र हुम्ला सिमकोट गाउँपालिका–४ निवासी वर्ष १७ को रमेश शाही घाइते भएका थिए । घाइते मध्ये राना र शाहीको अवस्था सामान्य रहेको छ भने जेसीभी चालक खड्काको टाउकोमा गम्भीर चोट लागेको अदानचुली ४ लौठी घर भएका स्थानीय दिनेश पाण्डेले बताए । घटना भएको जानकारी पाएलगत्तै लौठी गाउँबाट स्थानीय घटनास्थलमा पुगेका थिए । उनीहरूले घाइतेलाई स्टेचरमा राखेर तत्कालै श्रीनगर स्वास्थ्य चौकी पुर्याएका हुन । तीनै जनाको श्रीनगर स्वास्थ्य चौकीमा प्राथामिक उपचार भइरहेको भएपनि चालक खड्काको अवस्था निकै गम्भिर देखिएकाले अहिले तिनैजनालाइ हेलीकप्टर मार्फत सुर्खेत लगिएको उद्धार गरिएको छ । श्रीनगर स्वास्थ्य चौकीले उपचार गर्न सम्भव नभएको भन्दै रिफर गरेपछि ठेकदार कम्पनीलाई जानकारी गराई उनीहरुकै पहलमा हेलीकप्टर मार्फत थप उपचारको लागि सुर्खेत लगिएको हो । उक्त सडक निर्माणको ठेक्का हुम्लाकै कङ्ग्री निर्माण सेवाका छिरिङ लामाको गरि रहेका छन् ।
