सि.टा. समाचारदाता
सिमकोट । हुम्लाको सदरमुकाम सिमकोटमा खानेपानी आपुर्ती बन्द भएको पाँच दिनपछि सुचारु भएको छ । सदरमुकामलाई खानेपानी आपुर्ती गर्दै आएको हुमाने खोलाको मुहानको ईन्टेकमा पानी आपुर्ती गर्ने पाईप जडान गर्ने र बिचमा पहिरोले वगाएको पाईपलाईन जोडेपछि बुधबार दिउसोबाट खानेपानी सुचारु भएको हो ।
सिमकोट गाउँपालिकाको केन्द्र समेत रहेको सिमकोट बजार, वडा नम्बर ५ र ६ का उपभोक्तालाई खानेपानी आपुर्ती गर्दै आएको खानेपानी उपभोक्ता समितिले हुमाने खोलाको ईन्टेकमा पानी आपुर्ती गर्ने पहिरोले बगाएको एउटा मुहानको पाईप जोड्ने र बिचको पहिरोले बगाएको पाईपलाई जोड्ने कार्य सम्पन्न भएपछि सिमकोट बजारमा खानेपानी आपुर्ती सुचारु गरिएको समितिको टेक्निसियन रुपेन्द्र रोकायाले बताए । उक्त मुहानबाट शनिबार दिउसो पहिरोले मुहानको इन्टेकको पाईप बगाएपछि बजारमा त्यसयता पानी आपुर्ती बन्द हुदै आएको थियो । मर्मत कार्य गरेपछि काम चलाउन रुपमा भएपनि खानेपानी आपुर्ती गर्न संभव भएको हो । त्यसैगरि मुहानबाट रिजभार ट्याङ्कीसम्मको पाईपलाईन पनि पाँच वटा स्थानमा पहिरो बगाएको थियो र त्यो पनि जोड्ने कार्य गरिएको छ । सोमबारबाट बुधबारसम्म मर्मत कार्य गरिएको हो । शनिबारबाट सिमकोट बजार र दुई वटा वडाका उपभोक्ताले आकाशको जस्तापाताबाट खसेको प्रयोग गर्नु परेको थियो । भने सिमकोटको मुग्राधारामा पुगेर खानेपानी ब्यवस्था गर्नु परिरहेको थियो ।
फोटो क्याप्सन
सिमकोट बजारका स्थानीय धारामा पानी आउन सुरु भएपछि पानी थाप्दै ।
