सि.टा समाचारदाता
सिमकोट । एमाले प्रवेश गरेका नेकपा एकिकृत समाजवादीका केन्द्रीय सदस्य लोक बहादुर हमालले आफु कुनै पनि पद, बार्गेनिक, लोभमा लागेर एमाले प्रवेश नगरेको बताए । कम्युनिष्टहरु साना दलका रुपमा रहनु भन्दा एकिकृत ठुलो पार्टीका रुपमा रहनु पर्छ भन्ने मान्यता राख्दै पून एमालेमा फर्किएको उनले बताएका हुन ।
बिना बार्गेनिङ नेकपा एकिकृत समाजवादीका केन्द्रीय सदस्य लोक बहादुर हमालले पून एमालेमा फर्किएको बताएका छन् । नेकपा एमाले हुम्लाले आयोजना गरेको प्रशिक्षक प्रशिक्षण कार्यक्रममा केन्द्रीय सदस्य हमाले एमालेमा प्रबेश गरेका हुन । एमाले फर्किएका समाजवादीका केन्द्रीय सदस्य हमाललाई एमाले केन्द्रीय उपमहा सचिव एवं स्कुल बिभाग प्रमुख प्रदिप ज्ञवालीले खादा लगाएर स्वागत गरेका थिए । केही समय अगाडी एमालेबाटै फुटेको एकिकृत समाजवादीमा लागेको भएपनि अब पुरानै पार्टीमा फर्किएपछि स्वागत गर्दै नेता ज्ञवालीले आफ्नो र अर्को पार्टीबाट आएको भनेर विभेद नगर्ने बताए ।
नेकपा एमाले हुम्लाका संस्थापक सदस्य समेत रहेका हमाल नेकपाको फुटपछि एमालेबाट बिभाजित भएको नेकपा एकिकृत समाजवादीमा लागेका थिए । उनलाई समाजवादीले तत्कालीन अवस्था मै सो पार्टीको केन्द्रीय सदस्यमा चयन गरिएको थियो भने केही समय अगाडी सम्पन्न भएको महाधिबेशनबाट समेत केन्द्रीय सदस्यमा छनौट भएका थिए । एमाले फिर्तिपछि नेता हमालले आफु कुनै लोभ, लालच र सर्तमा एमाले फिर्ता नभएको बताए । कम्युनिष्टहरु साना टुक्रममा रहनु भन्दा एकिकृत भएर ठुलो पार्टी बन्नु पर्छ भन्ने मान्यता राख्दै पूनः एमालेमा फर्किएको उनले बताए । उनले समाजवादी लाग्नु आफ्नो कमीकमजोरी रहेको बताउदै उनले त्यो कुराको महशुस भएर पुरानै घरमा फर्किएको र पार्टीले आवश्यक ठानेमा दिने भूमिकाको जिम्मेवारी लिन तयार रहेको बताए । एमाले फर्किएका हमाललाई एमाले स्थायी कमिटीका सदस्य एवं कर्णाली प्रदेशका इन्चार्ज गोरख बोगटी, कर्णाली प्रदेशका अध्यक्ष गुलावजंग शाह, कर्णाली प्रदेशको स्कुल विभाग प्रमुख राजबहादुर बुढा, एमाले केन्द्रीय सदस्य छक्कबहादुर लामा, दलबहादुर रावल, दलबहादुर फडेरा लगाएतका नेताहरुले खादा लगाएर स्वागत गरेका थिए ।
