सि.टा. समाचारदाता
सिमकोट । केन्द्रका सत्तारुढ दल काँग्रेस–एमालेले सरकारलाई प्रभावकारी बनाउन संयन्त्र बनाए संगै कर्णाली प्रदेशवाट नेपाली काग्रेसले तीन जनालाई संयन्त्र विस्तारका लागि सिफारिस गरेको छ । सरकारलाई प्रभावकारी ढंगले सञ्चालन गर्न प्रधानमन्त्री केपी शर्मा ओली र काँग्रेस सभापति शेरबहादुर देउवाले आठ सदस्यीय संयन्त्र बनाएर प्रदेश र जिल्ला तहमा पनि संयन्त्र गठन बनाउने तयारी भएपछि कर्णाली प्रदेशमा पनि सम्यन्त्रका लागि सदस्यको नाम सिफारिस गरिएको हो ।
सरकार सञ्चालन व्यवस्थित र प्रभावकारी बनाउन नेपाली काग्रेस कर्णाली प्रदेशका तर्फवाट प्रदेश सभापति ललितजंग शाही, महामन्त्री निरन्जन केसी र आर्थिक मामिला तथा योजना मन्त्री राजिव विक्रम शाहलाई सिफारिस गरेको हो । नेपाली काग्रेस र नेकपा एमालेको संयुक्त सरकारलाई सफल वनाउन कर्णाली प्रदेशमा छ सदस्यीय संयन्त्र विस्तार हुनेछ । संयन्त्र विस्तारका लागि नेकपा एमालेले तीन जना सिफारिस गरेलगत्तै कर्णाली प्रदेश संयन्त्रले पूर्णता पाउने छ । नेकपा एमालेले पनि संयन्त्रमा पठाउने सदस्यको आन्तरिक तयारी थालेको छ । केन्द्रमा सात बुँदे सहमति अनुसार संयन्त्रमा एमालेबाट वरिष्ठ उपाध्यक्ष ईश्वर पोखरेल, उपप्रधान तथा अर्थमन्त्री विष्णु पौडेल, महासचिव शंकर पोखरेल र उपमहासचिव विष्णु रिमाल रहेका छन् । काँग्रेसबाट उपसभापति पूर्णबहादुर खड्का, महामन्त्री गगन थापा, गृहमन्त्री रमेश लेखक र परराष्ट्रमन्त्री आरजु राणा सदस्य छन् ।
