सि.टा. समाचारदाता
सिमकोट । कर्णालीका छ जिल्लाका रिक्त भएका आठ पदका लागि मंसीर १६ गते उपनिर्वाचन हुनेछ । कर्णाली प्रदेशका स्थानीय तहमा रिक्त रहेको पदका लागि आगामी मंसिर १६ गते उपनिर्वाचन हुनेछ ।
कर्णालीमा आठ पदका लागि उपनिर्वाचन हुने भएको हो ।
जसमा एक जना गाउँपालिका अध्यक्ष , नगरपालिका उपप्रमुख एक जना, गाउँपालिका उपाध्यक्ष एक र पाँच वडाध्यक्ष गरी आठ पदमा कर्णालीका स्थानीय तहमा उपनिर्वाचन हुने भएको हो ।
जाजरकोटको नलगाड नगरपालिकामा उपप्रमुख पदका लागि उपनिर्वाचन हुनेछ । नेपाली काँग्रेसबाट उपप्रमुखमा निर्वाचित सरिता सिंहको भूकम्पमा परी निधन भएपछि नलगाडमा उपनिर्वाचन हुन लागेको हो । कुसे गाउँपालिका–७ का वडाध्यक्ष मनबहादुर घर्तीको निधनपछि उक्त पदका लागि निर्वाचन हुन लागेको हो । यता दैलेखको महावु गाउँपालिकाका अध्यक्ष लछुमन गुरुङको हृदयघातका कारण निधन भएको हुँदा महावुमा उपनिर्वाचन हुन लागेको हो । गुरुङ कांग्रेसबाट निर्वाचित जनप्रतिनिधि हुन । दुल्लु नगरपालिकाको १३ नम्बर वडामा पनि वडाध्यक्ष पदका लागि उपनिर्वाचन हुने भएको छ । एमालेबाट वडाध्यक्षमा निर्वाचित विर्खबहादुर शाहीको ब्रेन ट्युमरका कारण निधन भएपछि वडाध्यक्ष पद खाली थियो । हुम्लाको सर्केगाड गाउँपालिकामा पनि उपाध्यक्ष पदका लागि उपनिर्वाचन हुँदैछ । नेकपा माओवादी केन्द्रबाट जितेका चन्द्र सिँह कार्कीको गाडी दुर्घटनामा परी मृत्यु भएपछि पालिका उपाध्यक्ष रिक्त रहेको छ । कालीकोटको तिलागुफा नगरपालिकाको –४ नम्बर वडामा पनि वडाध्यक्ष पदका लागि उपनिर्वाच हुन लागेको हो । माओवादी केन्द्रबाट निर्वाचित वडाध्यक्ष परबहादुर शाहीको निधनपछि सो पद रिक्त छ । कर्णाली कै अर्को जिल्ला डोल्पाको त्रिपुरासुन्दरी नगरपालिका– ५ को वडाध्यक्ष पदका लागि पनि उपनिर्वाचन हुनेछ । एमालेका तर्फबाट निर्वाचित नन्दलाल रोकाको मृत्युपछि पद खाली छ । यस्तै रुकुमपश्चिमको सानीभेरी गाउँपालिका–५ को वडाध्यक्ष पदका लागि पनि उपनिर्वाचन हुँदैछ । २०७९ मा कांग्रेसबाट निर्वाचित भएका वडाध्यक्ष अलबहादुर खत्रीको जन्डिसका कारण निधन भएको थियो ।
