सि.टा. समाचारदाता
सिमकोट । हुम्ला जिल्लाको सर्केगार्ड गाउँपालिकाको केन्द्र सर्केगार्डबाट सुर्खेतसम्म बस सेवा सञ्चालनमा आएपछि यात्रुहरुलाई सहज भएको छ । यातायात प्रालिको कार्यालय सर्केगार्डमा स्थापना हुँदा दैनिक रुपमा बस सञ्चालनमा आएपछि यात्रुहरुलाई आर्थिक र यात्रा गर्न सहज भएको हो ।
सर्केगार्डबाट सुर्खेत यात्रा गर्नु भएका यात्रु दिनेश बोहराले पहिले जस्तो यात्रा गर्न यातायातका साधन नपाउने समस्या समाधान भएको बताए । सिमकोटबाट सर्केगार्डसम्म जीप र मोटर साईकलमा यात्रा गर्नु भएका रावतले सर्केगार्डबाट सुर्खेतका लागि बसमा यात्रा गरेको बताउदै बस सञ्चालनमा आएपछि यात्रा पनि सहज बन्दै गएको उनको भनाई छ । उनले सो यात्राका लागि तीन हजार पाँच सय रुपियाँको टिक काटेका थिए । यसअघि यात्रा गर्दा यात्रुहरुले जीपमा टिकट नपाउने पाएपनि महङ्गो भाडा तिर्नु पर्ने अवस्था रहेको भएपनि अहिले सो अवस्था हटेको छ । सर्केगार्डमा यातायात प्रालि स्थापना गरेकै कारण बस सेवा सञ्चालनमा आएको हो । हाल सर्केगार्डमा रारा छायाँनाथ,मध्यपश्चिम, सुर्खेत बुलबुले, राधाकृष्ण र खार्पुनाथ यातायात प्रालि गरि पाँच वटा स्थापना भएको र दैनिक एउटा बस सर्केगार्डबाट सुर्खेतका लागि सञ्चालनमा आएको छ । बस सेवा सञ्चालनमा आएपछि यसअघि यात्रु पुगेपछि मात्र जान पाईने र त्यो पनि महङ्गो भाडा तिर्नु पर्ने समस्या यात्रुहरुका लागि हटेको छ । सर्केगार्डबाट सुर्खेतका लागि पहिलो पटक बस सेवा सञ्चालनमा आएको हो । दैनिक बिहान नौ देखि दश बजे भित्र सर्केगार्डबाट सुर्खेतका लागि बस छुट्ने गर्छ । प्रालिहरुले बसमा यात्रु संख्या पुगे पनि नपुगे पनि छुट्नै पर्ने नियम लागु गरेको कारण पनि यात्रुहरुलाई सहज भएको छ । प्रालि सर्केगार्डमा स्थापना भएपछि यसअघि बाजुराको धुलाचौर र पिलीमा लाग्दै आएको यात्रायात सिन्डिकेट पनि हटेको छ । सिन्डीकेट हटाउनका लागि बाजुराको प्रशासन कार्यालयले पनि सघाएको छ । हाल सर्केगार्डमा मात्र पन्द्र वटा बसहरु ल्याईएका छन् ।
