ग्राम ज्योति सम्वाददाता
राजविराज, १७ असार । जिल्ला फुटबल संघ सप्तरीद्वारा संचालित प्रथम राजविराज मेयर गोल्डकप फुटबल प्रतियोगिताको उपाधी मलिथम फुटबल क्लब उदयपुरले हात पारेको छ ।
सप्तरी सदरमुकाम राजविराजस्थित राजरंगशालामा शनिबार सम्पन्न फाईनल खेलमा धनुषा जिल्ला फुटबल क्लब जनकपुरलाई ०–२ गोलान्तरले पराजित गर्दै उदयपुरले उपाधिमाथी कब्जा जमाएको हो । उदयपुरको तर्फबाट पहिलो हापको २५ औं मिनेटमा जर्सी नम्बर ७ का आशिष चौधरीले १ गोल गरे भने खेलको ३५ औं मिनेटमा जर्सी नम्बर १७ का कृपा चौधरीले १ गोल गरे । निर्धारित ९० मिनेटको खेलमा दुबै टिम विच कडा प्रतिस्पर्धा भएपनी जनकपुरको तर्फबाट कुनै गोल गर्न नसकेको आयोजकले जनाएको छ ।
राजविराज नगरपालिकाको सहयोगमा जिल्ला फुटबल संघ सप्तरीद्वारा संचालित प्रतियोगिताकोमा विजेता टिमलाई नगद १ लाख ५० हजार, शिल्ड, मेडल प्रमाणपत्र र उपविजेता टिमलाई नगद १ लाख कप, मेडल, प्रमाणपत्र प्रदान गरिएको थियो । जिल्ला फुटबल संघ सप्तरीका अध्यक्ष राज कुमार परियारको अध्यक्षतामा आयोजित कार्यक्रममा विजेता तथा उपविजेता टिमलाई राजविराज नगरपालिकाका कार्यबाहक मेयर इसरत परविनले पुरस्कार प्रदान गरिन । खेलमा बेस्ट गोलकिपर, डिफ्रेन्स, स्कोलर, मिड फिल्डर र सर्वोउत्कृस्ट खेलाडीलाई नगद ५ हजारको दरले पुरस्कार प्रदान गरिएको जिल्ला खेलकुद विकास कार्यालय सप्तरीका प्रमुख दिनेश भुजेलले जानकारी दिए।
कार्यक्रममा पुर्व खेलाडीहरुलाई समेत सम्मान गरिएको जिल्ला फुटबल संघ सप्तरीका अध्यक्ष राजकुमार परियारले जानकारी दिए ।
