सि.टा. समाचारदाता
सिमकोट । असोज १७ गतेदेखि लगातार तीन दिन भीषण वर्षा हुने भन्दै सामाजिक सञ्जालमा फैलिएको सूचना भ्रामक रहेको जल तथा मौसम विज्ञान विभागले स्पष्ट पारेको छ । विभागले त्यस्तो कुनै पूर्वानुमान नगरेको जनाउँदै आधिकारिक मौसम सूचना मात्र विश्वास गर्न आग्रह गरेको छ ।
मौसमविद् सुदर्शन हुमागाईका अनुसार हाल देशमा भीषण वर्षा गराउने खालको कुनै मौसमी प्रणाली छैन । आगामी दिनमा अपरान्ह तथा साँझतिर कोशी, बागमती र गण्डकी प्रदेशका केही पहाडी भूभागमा हल्का तथा कतै–कतै मध्यम वर्षा हुन सक्ने सम्भावना रहे पनि ठुलो वर्षाको अवस्था रहेको छैन । ठुलो पानी पर्ने, भीषण पानी पर्ने त्यस्तो मौसम प्रणाली देशमा नभए अपरान्ह, साँझतिर कतै–कतै बादल लाग्ने र पानी पर्न सक्ने सम्भावना भने जनाईएको छ । विभागले असोज १३ गते जारी गरेको सूचनामा पनि असोज १७ गतेदेखि तीन दिन भीषण वर्षा हुनेसम्बन्धी कुनै पूर्वानुमान नगरिएको र हालको मौसमी गतिविधिमा खासै फेरबदल नदेखिएको जनाएको थियो । सामाजिक सञ्जाल तथा अन्य माध्यमबाट फैलिएका त्यस्ता भ्रामक सूचनाको पछि नलाग्न विभागले आग्रह गरेको छ । हुमागाईका अनुसार काठमाडौँ उपत्यकामा पनि आगामी दिनमा अपरान्ह तथा साँझतिर बादल लाग्ने र केही स्थानमा क्षणिक हल्का वर्षा हुन सक्छ । हालको अवस्थाले पछिल्लो समय देखिएजस्तो ठुलो वर्षा, बाढी तथा पहिरोको जोखिम नरहेको पनि स्पष्ट पारिएको छ । यद्यपि स्थानीय रूपमा वर्षा हुनसक्ने भएकाले मौसमको अद्यावधिक सूचना हेर्न मौसम विद्धले सुझाव दिएका छन् । मौसम पूर्वानुमानमा तीन दिनसम्मको पूर्वानुमान तुलनात्मक रूपमा बढी विश्वसनीय हुने भए पनि त्यसपछि मौसममा परिवर्तन भने आउन सक्ने छ । विभागले दैनिक दुई पटक मौसम पूर्वानुमान अद्यावधिक गर्छ ।
