सि.टा. समाचारदाता
सिमकोट । बडा दशै लागेसंगै खसीको मुल्य ३६ हजारसम्म पुगेको छ । यस पटक पनि चीनबाट च्याङ्ग्रा आई नपुग्नु र जिउदो खसीको मुल्य नतोकिएको कारण ब्यापारीहरुले आफु खुसी मुल्या निर्धारण गर्दा खसीको मुल्य चर्को पर्न थालेको हो ।
सिमकोट गाउँपालिका– २ का काला भण्डारीले यसपाली दशैमा खसीको मुल्य महंगो परेको बताए । दशैका लागि सिमकोट ल्याईएका खसीको मुल्य ३६ हजार सम्म परेको बताउदै उनले यस अघि सो मुल्य कहिल्यै नतिरेको बताए । यो अवस्था जिल्लाभर उस्तै देखिएको छ । त्यसैले पनि यस पटक उपभोक्ताहरुका लागि दशै महङ्गो पर्ने देखिएको छ । गत वर्ष सबै भन्दा बढी मुल्य भने कै ३२ हजारसम्म परेको बताउदै उनले यस वर्ष एउटा खसीमा चार हजार बढी मुल्य पर्ने गरेको जानकारी दिए ।
अर्का स्थानीय नन्द रावतले यसरी खसीको मुल्य बृद्धि हुनुमा चीनबाट च्याङ्ग्रा आउन बन्द हुनु र बजारमा जिउदो खसीको मुल्य निर्धारण नभएको कारणले मुल्य बृद्धि भई रहेको बताए । सबैको सहमतिमा जिउदो खसीको मुल्य निर्धारण गर्न आवश्यक रहेको बताउदै उनले यसरी खसीको मुल्य बृद्धि भएपछि सर्वसाधारण सबैले दशैमा खसीको बली चढाउन कठिन हुने बताए । यसबाट धनीका लागि दशै दशै भएपनि गरिबका लागि भने दशै दशा हुने अवस्था रहेको उनले बताए । बडा दशै सवैले सहज रुपमा मनाउनका लागि जिउदो खसीको पनि मुल्य निर्धारण गर्न आवश्यक रहेको उनले बताए । यतिबेला बजार क्षेत्रमा जति पनि दशैका लागि खसी आई पुगेका छन्, ती खसीहरुको मुल्य पनि उस्तै पर्ने गरेको छ ।
