सि.टा .समाचारदाता
सिमकोट । फुलपातीको अवसर पारेर सदरमुकाम सिमकोटमा पर्यटक सुचना केन्द्र स्थापना गरिएको छ । जिल्लाको पर्यटकीय क्षेत्रको प्रर्बद्धन, प्रचार प्रसार गर्नका लागि सिमकोट गाउँपालिका र पर्यटन बोर्डको सहकार्यमा उक्त सुचना केन्द्र स्थापना गरिएको हो ।
जिल्लामा भित्रिने आन्तरिक तथा बाह्य पर्यटकहरुलाई हुम्लाका पर्यटकीय स्थलहरुको जानकारी दिने उद्धेश्यले सिमकोटको बिमानस्थल नजिक पर्यटक सुचना केन्द्र स्थापना गरिएको सिमकोट गाउँपालिकाका अध्यक्ष बिजय भण्डारीले बताए । केन्द्र औपचारिक रुपमा स्थापना भएको र यसमा सरोकारवाला सवै पक्षको सहयोगको अपेक्क्षा उनले राखे । केन्द्रको सिमकोट गाउँपालिकाका अध्यक्ष भण्डारी र नाम्खा गाउँपालिकाको अध्यक्ष प्रेमबहादुर लामाले सम्युक्त रुपमा उद्घाटन गरेका छन् । नक्शामा पर्यटकीय र धार्मिक पर्यटकीय क्षेत्रलाई पनि समेटिएको छ । हाललाई सुचना केन्द्रमा जिल्ला भरिका पर्यटकीय स्थलको जानकारी दिने नक्शाहरु राखिएको छ । त्यसमा बिशेष गरि सिमकोट मानसरोवर कैलाशरुट, सिमकोट लिमी लाप्चा रुट, सिमकोट रानी खर्क, सिमकोट चाङ्ला हिमाल रुट र सिमकोट रारा रुटको बारेमा नक्शामा उल्लेख गरिएको छ । भर्जिन पर्यटकीय स्थलहरु प्रसस्तै भएपनि त्यसको हालसम्म सहजै जानकारी पाउने ब्यवस्था नभएको कारण यो केन्द्र स्थापना गरिएको उनले बताए । सुचना केन्द्रका नक्शाका साथै जिल्लाका पर्यटकीय स्थलहरुको फोटो र अन्य जानकारी दिने सामाग्री पनि राखिनेछ । केन्द्र दैनिक रुपमा सञ्चालन गरिनेछ । त्यसका लागि गाउँपालिकाले दुई जना कर्मचारी खटाउने छ । अब सिमकोट गाउँपालिकाले राजस्व शुल्क पनि सोही केन्द्रबाट उठाउन सुरु गर्नेछ । कार्यक्रममा नाम्खा गाउँपालिकाका अध्यक्ष लामाले केन्द्रलाई पर्यटन सम्वन्धि जानकारी गराउन र सहयोग गर्न आफ्नो गाउँपालिका तयरा रहेको बताए । सिमकोट गाउँपालिका र पर्यटक बोर्ड केन्द्र स्थापना गरेको भएपनि यो जिल्ला कै लागि अति आवश्यक रहेको उनले बताए । कार्यक्रममा सिमकोट गाउँपालिकाका उपाध्यक्ष शुशिला भाम रोकाया, नाम्खा गाउँपालिकाका उपाध्यक्ष तकदिर लामा, राजनीति दलका नेताहरु, जनप्रतिनिधिहरुको उपस्थिती रहेको थियो ।
