सि.टा. समाचारदाता
सिमकोट । स्थानीय स्याउबाट उद्यमीले जाम र जुस उत्पादन गरेर बजारमा बिक्री सुरु गरिएको छ । गुणस्तर बिभागबाट उक्त जुस र जामले गुणस्तरीय भएको अनुज्ञापत्र प्रदान गरेपछि उद्यमीले त्यसलाई लेभव लगाएर बजारमा बिक्री सुरु गरिएको छ ।
जिल्ला मै उत्पादन भएको स्याउबाट जाम र जुस उत्पादन गरेर बजारमा बिक्रीका लागि पठाउन सुरु गरिएको सञ्जय कृषि तथा खाद्य उद्योगका सञ्चालक तुथासरा बोहराले बताईन । यसअघि नै उद्योग स्थापना गरिएको थियो । उत्पादन गरिएको स्याउको जुस र जामलाई बजारमा जानु अघि गुणस्तर तथा नापतौल कार्यालय सुर्खेतमा पठाएर ल्याव परिक्षण पछि गुणस्तर मापनका अनुज्ञा पत्र पाएको थियो । सो पत्र पाएपछि बिक्री कार्य सुरु गरिएको उनले बताईन । हाललाई स्याउको जुस दुई सय लिटर, जाम आधा केजीको १५० बोटल उत्पादन गरेर बिक्री सुरु गरिएको हो । जुस प्रति लिटर तीन सय रुपियाँ र जाम आधा केजीको दुई सय पचास रुयिपाँमा बिक्री गर्ने गरिएको छ । दुवै उत्पादन उपभोक्ताले मन पराएपछि माग बढी रहेको छ । त्यसैगरि एक हजार प्याकेट हुम्लाको स्थानीय आलुको चिप्स पनि उत्पादन गरिएको छ । पैतीस ग्रामको आलु चिप्सको प्याकेटको मुल्य पचास रुपियाँ पर्ने गर्छ । तीन उत्पादन बजारमा गएको र खपतको अवस्था हेरी बाँकी उत्पादन गर्ने तयारी उद्योगले गरेको छ । त्यसैगरि डाँले चुकको पनि जुस र जाम उत्पादन गर्ने तयारीका उद्योग रहेको छ । डाले चुक पाकेपछि जुस र जाम उत्पादन गरिनेछ । उद्योगले जुस, जाम र आलु चिप्न उत्पादन गर्ने मेशिनका लागि पचास प्रतिशत अनुदान प्रधानमन्त्री कृषि आधुनिकीकरण परियोजनाबाट पाएको थियो ।
