सि.टा. समाचारदाता
सिमकोट । सडक निर्माणको काम गर्ने क्रममा एक जना कामदारको माथिबाट ढुङ्गा खसेर टाउको लाग्दा घाईते भएको अवस्थामा मृत्यु भएको छ ।
अदानचुली गाउँपालिका– २ को बुढावाडाका ४८ वर्षका हिर बुढाको काम गर्ने औजार लिन जाने क्रममा थलाहाल्नाको सडक मै माथिबाट ढुङ्गा खस्दा टाउकोमा लागेर घाईते भएका थिए।
बुधबार बिहान दश वजे अदानचुली गाउँपालिकाको गल्फागार्डदेखि गाउँपालिका केन्द्रसम्म निर्माण कार्य भई रहेको सडकमा काम गर्ने क्रममा अर्को स्थानमा रहेको ओजार लिन जाने क्रममा माथिबाट ढुङ्गा खस्दा बुढाको टाउकोमा लागेर घाईते भएको अवस्थामा नजिकको स्वास्थ्य चौकीमा लगेर उपचार भई रहेको बेला मृत्यु भएको प्रहरी नायव उपरिक्षक शंकर खड्काले बताए ।
स्वास्थ्य चौकीमा उपचार सुरु भएको केही समय मै बुढाको मृत्यु भएको थियो । मृतक बुढा गम्भीर घाईते भएपछि सुर्खेतबाट हेलिकोप्टरमा उद्धार गर्ने तयारी भएको भएपनि स्वास्थ्य चौकीमा उपचारका क्रममा मृत्यु भएपछि सो योजना रद्ध गरिएको छ । उक्त सडक कालो पत्रे गर्ने गरि हाल स्तरोन्नतीको कार्य भई रहेको छ ।
